प्रतिनिधि सभा र प्रदेश सभाको निर्वाचन आउन केही दिन बाँकी छ । निर्वाचनमा मुख्य मानिएका दलले पुरानै अनुहारलाई दोहोर्याइरहेका छन् भने केही नयाँलाई पनि मौका दिएका छन् । कतिपय क्षेत्रमा यसपटक लामो समय एउटै पार्टीमासँगै राजनीति गरेका एमाले र एकीकृत समाजवादीका सहयात्री भिड्दै छन् भने कतिपय स्थानमा उम्मेदवारहरूले अन्तिम पटक भोट मागिरहेका छन् । लुम्बिनी प्रदेशको यस पटकको निर्वाचन रोचक हुने निश्चित छ ।
नेपाली कांग्रेस बाँकेका सुदिप नरसिंह राणाले २०४९ सालदेखि नेविसंघ हुँदै राजनीतिक यात्रा गरेका थिए । उनी कांग्रेसको १२ औं, १३ औं र १४ औं महाधिवेशनको प्रतिनिधि समेत भएका थिए । यसपालि उनले पहिलो पटक लड्ने अवसर पाएका छन् । उनी बाँकेको निर्वाचन क्षेत्र नम्बर २ बाट प्रतिनिधि सभा सदस्यमा उठेका छन् ।
कांग्रेसले प्रदेश सभामा पनि केही नयाँ अनुहारलाई टिकट दिएको छ । नेपाली कांग्रेसका पूर्व जिल्ला सभापति भुवन श्रेष्ठ गुल्मी जिल्ला क्षेत्र नं. २ (१) बाट उम्मेदवार बनेका छन् । उनले २०३८ सालदेखि कांग्रेसको सक्रिय राजनीति गरेकामा यसपटक आफू सांसद पदका लागि उम्मेदवार बनेको बताए । उनले आफू गठबन्धनको उम्मेदवार भएको र यो उम्मेदवारी प्रतिगमन विरुद्धको कदम भएको बताए । हालसम्म प्राप्त राजनितिक उपलब्धी संरक्षण गर्न आफू भिड्ने उनले बताए । उनीसँग नेकपा एमालेका डिल्लीराज भुषालले प्रतिस्पर्धा गर्दैछन् ।
दीर्घबहादुर केसी नेपाली कांग्रेसकै रुपन्देही क्षेत्र नं. २ (१) बाट खेल क्षेत्रको प्रतिनिधित्व गर्दै राजनीतिमा उदाएका हुन् । उनले राजनीतिलाई खेल जस्तै निष्पक्ष तरिकाले खेल्न आफूले आगामी निर्वाचनमा उम्मेदवारी दिएको बताए । हरेक क्षेत्रको विकास गर्न राजनीति नै चाहिने देखेपछि उपेक्षित खेल क्षेत्रको विकासका लागि आफूले राजनीतिक यात्रा थालेको उनले बताए ।
२०४३ सालमा गोर्खा ब्वाईज क्लबबाट फुटबल खेल्न थालेका उनी जिल्ला फुटबल संघको सदस्य, कोषाध्यक्ष हुँदै २०७० सालमा रुपन्देही फुटबल संघको अध्यक्ष भएका थिए । २०७५ सालमा केन्द्रीय सदस्य भएँ,’ उनले भने, ‘०७५ सालमा नेपाल ओलम्पिक कमिटीको सदस्य र अहिले उपाध्यक्ष भएको छु ।’ १२ औं महाधिवेशनबाट राजनीतिमा सक्रिय भएका केसीले १४ औं महाधिवेशनमा प्रदेश सदस्यता प्राप्त गरेका थिए । रुपन्देही जिल्ला र लुम्बिनी प्रदेशमा खेलकुद पर्यटनको प्रचुर सम्भावना रहेको केसी बताउँछन् । उनले यस क्षेत्रमा खेलका पूर्वाधार बनाउन, बहुउद्देश्यीय रंगशाला निर्माण गरी खेल पर्यटक भित्र्याउन सक्नेगरी अन्तर्राष्ट्रिय खेलकुद गर्न सके भारतीय लगायत अन्य देशका खेलाडी र पर्यटक मार्फत देश विकासमा टेवा पुर्याउने अपेक्षा रहेको बताए ।
रुपन्देही जिल्लाको क्षेत्र नंं. ५ मा नेकपा एमालेले तिलोत्तमा नगरपालिकाका पुर्व प्रमुख वासुदेव घिमिरेलाई टिकट दिएको छ । कृषि साथै बैंकिङ क्षेत्र तथा संघसंस्थामा आवद्ध रही विदेशी भूमिमा समेत केही वर्ष काम गरी सकेका छन् । २०४४ मा वाणिज्य क्याम्पस बुटवलमा अध्ययन गर्दा उनी अनेरास्ववियुको सम्पर्कमा आए । उनले पञ्चायत विरुद्धको अभियानमा लागेको बताए । २०४८ सालमा नेकपा एमालेको सदस्यता प्राप्त गरेका उनी बीचमा २ वर्ष सीप सिक्न र पैसा कमाउन विदेश गइ २०५१ सम्म उतै रहे । उताबाट फर्केपश्चात गाउँ कमिटीको वडामा ३ कार्यकाल सचिव रहे । युवा संघको सदस्य भई जिल्ला कमिटीमा पनि ३ कार्यकाल सदस्य भई काम गरे । साथै युवा कमिटी जिल्लाको अध्यक्ष पनि बने । हाल उनी प्रदेश कमिटी लुम्बिनीको सदस्य र पार्टीको केन्द्रमा स्थानीय तह विभाग सदस्य हुन् ।
पार्टीले आफ्नो कामको मुल्यांकन गरी तिलोत्तमा नगरपालिकाको मेयरको रुपमा लड्न अवसर दिएकामा आफुले नमूना नगर बनाएपछि त्यही फल स्वरुप प्रतिनिधि सभामा उठ्ने मौका पाएको उनले बताए । पार्टीमा होस् वा संसदीय यात्रामा पार्टी र जनताले दिएको जिम्मेवारी पूरा गर्ने उनले बताए ।
पाल्पा जिल्लामा नेकपा एमालेले ठाकुर गैरेलाई उठाएको छ । उनी माध्यामिक तहको अध्ययन गर्दादेखि नै राजनीतिमा सक्रिय थिए । २०५१ सालमा अनेरास्ववियुको पाल्पा जिल्ला अध्यक्ष समेत भएर काम गरेका उनी २०६३ सालमा अनेरास्ववियुको केन्द्रीय अध्यक्ष भए । उनले २०६६ देखि नेकपा एमालेको केन्द्रीय कमिटीमा चुनिएर काम गरेका छन् । अहिले उनी पोलिटब्युरो सदस्य छन् ।
गैरे तत्कालीन राजकुमार पारस शाह विरुद्ध ५ लाख २३ हजार हस्ताक्षर संकलन गरी राजा वीरेन्द्रलाई ज्ञापन पत्र बुझाउने अभियानमा संलग्न थिए । २०६२/०६३ को आन्दोलनमा आफनो भुमिका महत्वपुर्ण रहेको उनले बताए ।
भारतीय नाकाबन्दी विरुद्ध आफू उठेको, एनसेलको कर छली प्रकरण विरुद्धको आनदोलनमा समेत आफुले महत्वपूर्ण भूमिका निभाएको उनले बताए । उनले चुनावका बेला मात्र नभई सदैव जनताका मर्का बुझ्ने बताए ।
जनताले नयाँ अनुहार चाहेकाले आफूले मत पाउने विश्वास उनलाई छ । उनले आफ्नो उम्मेदावरी कम्युनिष्ट फुटाल्न खोज्ने विरुद्ध भएको बताए । भ्रष्टाचारको अन्त्य गर्ने, युवा विद्यार्थीलाई रोजगारी दिने, शिक्षा र स्वास्थ्य क्षेत्रमा सुधार गर्ने, देश र जनताको सम्बृद्धिको चाहना पूरा गर्नेतर्फ आफू लागिपर्ने गैरेले बताए ।
एमालेकै तर्फबाट दाङ जिल्लाको क्षेत्र नं. २ (१) मा भिड्दैछन् नेता बलिभद्र राना । २०५६ सालमा विद्यार्थी राजनीति थालेका उनले पार्टीको विश्वास डगमगाउन नदिनका लागि आफू उम्मेदवार भएको बताए । मैले जितें भने दाङलाई राजधानी तोकेर बुटवलमै बसिरहेको प्रदेशलाई दाङमै ल्याउने काम गर्ने बताए ।
आफूले ३० वर्षमा निर्माण व्यवसायमा हासिल गरेको अनुभवलाई प्रदेशको विकासमा लगाउने पनि बताए । प्यूठान जिल्लाको क्षेत्र नं. १ (१) मा पाँच दलीय गठबन्धनका उम्मेदवार छन् माओवादी केन्द्रका कृष्ण कुमार अधिकारी (प्रकाश) । २०४१ सालमा अनेरास्ववियुका क्रान्तिकारीको अध्यक्ष हुंदै सुरु भएको उनको राजनीतिक यात्रा । देश र जनताका लागि ज्यानको बाजी थाप्न सक्न आफूजस्ता उम्मेदवारलाई जनताले विकासका काम गर्न पठाए ढुक्क भई काम गर्ने विश्वास दिलाउन सकेको उनले बताए । जनताको छोरा जनताकै लागि भन्ने नारा आत्मसाथ गरेको छु, उनले भने, देशको सिपाही हुं, जनताले साथ दिए जनताकै साथमा हुन्छु ।
लुम्बिनी प्रदेशमा प्रतिनिधि सभा सदस्यका नयाँ उम्मेदवारहरू
| क्र.सं. | उम्मेदवारको नाम | पार्टीको नाम | निर्वाचन क्षेत्र |
| १ | वासुदेव घिमिरे | नेकपा एमाले | रुपन्देही–५ |
| २ | ठाकुर प्रसाद गैरे | नेकपा एमाले | पाल्पा–२ |
| ३ | ज्ञान बहादुर गाहा | नेपाली कांग्रेस | पाल्पा–२ |
| ४ | सुदिप नरसिंह राणा | नेपाली कांग्रेस | बाँके–२ |
| ५ | किशोर सिंह राठौर | नेपाली कांग्रेस | बाँके–३ |
| ६ | सूर्य बहादुर थापा | नेकपा एमाले | प्यूठान |
| ७ | सूर्य प्रसाद ढकाल | नेकपा एमाले | बाँके–१ |
| ८ | किस्मत कुमार कक्षपती | नेकपा एमाले | बाँके–३ |
| ९ | दीपेन्द्रकुमार अधिकारी | नेकपा एमाले | पश्चिम नवलपरासी–२ |
| १० | पूर्णबहादुर बुढा मगर | नेकपा एमाले | रोल्पा |
| ११ | कैलाशकुमार मल्ल | नेकपा एमाले | रुकुम पुर्व |
| १२ | सुरेश पन्त | नेकपा माओवादी केन्द्र | बर्दिया क्षेत्र नं. २ |
लुम्बिनी प्रदेशमा प्रदेश सभा सदस्यका नयाँ उम्मेदवारहरू
| क्र.सं | उम्मेदवारको नाम | पार्टीको नाम | निर्वाचन क्षेत्र |
| १ | चिन्तामणी पाण्डे | नेकपा एमाले | गुल्मी १ (१) |
| २ | फर्सुराम पाण्डे | नेकपा एमाले | गुल्मी १ (२) |
| ३ | डिल्लीराज भुषाल | नेकपा एमाले | गुल्मी २ (१) |
| ४ | भुवन प्रसाद श्रेष्ठ | नेपाली कांग्रेस | गुल्मी २ (१) |
| ५ | दिनेश पन्थी | नेकपा एमाले | गुल्मी २ (२) |
| ६ | बुद्धि बहादुर घर्ती | नेकपा माओवादी | गुल्मी २ (२) |
| ७ | राजु प्रसाद श्रेष्ठ | नेकपा एमाले | पाल्पा १ (१) |
| ८ | श्यामकान्त खनाल | नेपाली कांग्रेस | पाल्पा १ (१) |
| ९ | खेम बहादुर सारु | नेकपा एमाले | पाल्पा १ (२) |
| १० | शंकर खनाल | नेपाली कांग्रेस | पाल्पा १ (२) |
| ११ | पर्सुराम भट्टराई | नेकपा एमाले | पाल्पा २ (१) |
| १२ | सागर के.सी (क्षेत्री) | राष्ट्रिय जनमोर्चा | अर्घाखाँची १ (१) |
| १३ | कमल प्रसाद भुषाल | नेपाली कांग्रेस | अर्घाखाँची १ (२) |
| १४ | टक बहादुर चेवाली | जसपा नेपाल | अर्घाखाँची १ (२) |
| १५ | रामचन्द्र ढकाल | नेपाली कांग्रेस | रुपन्देही ३ (२) |
| १६ | प्रदेशी केवट | जनमत पार्टी | रुपन्देही १ (१) |
| १७ | रामचन्द्र यादव | नेकपा एमाले | रुपन्देही ५ (२) |
| १८ | दीर्घबहादुर केसी | नेपाली कांग्रेस | रुपन्देही २ (१) |
| १९ | सुनिल कुमार गिरी | नेकपा एमाले | रुपन्देही ४ (१) |
| २० | राम अवतार यादव | जसपा | रुपन्देही ४ (२) |
| २१ | बिक्रम थापा | नेपाली कांग्रेस | कपिलबस्तु २ (१) |
| २२ | नवराज लामिछाने | नेकपा एमाले | कपिलबस्तु २ (१) |
| २३ | अनुराग खड्का | नेपाली कांग्रेस | दाङ १ (२) |
| २४ | प्रचण्ड बिक्रम न्यौपाने | कांग्रेस | दाङ २ (२) |
| २५ | हुकुम बहादुर बस्नेत | नेकपा एमाले | दाङ ३ (२) |
| २७ | बलिभद्र राना | नेकपा एमाले | दाङ २ (१) |
| २८ | अम्बर बहादुर खड्का | जसपा | बाँके १ (१) |
| २९ | राजेन्द्र कुमार विश्वकर्मा | लोसपा | बाँके १ (१) |
| ३० | फुलाराम थारु | नेपाली कांग्रेस | बाँके १ (२) |
| ३१ | लाल बहादुर शाह | जसपा | बाँके १ (२) |
| ३२ | दुर्गा प्रसाद चौधरी | नेकपा एमाले | बाँके १ (२) |
| ३३ | राजकुमार कुर्मी | नेपाली कांग्रेस | बाँके २ (१) |
| ३४ | भण्डारी लाल अहिर | जसपा | बाँके २ (१) |
| ३५ | निरक बहादुर गुरुङ | नेकपा एमाले | बाँके २ (२) |
| ३६ | अकल बहादुर बम | नेकपा माओवादी | बाँके २ (२) |
| ३७ | आदेश कुमार अग्रवाल | नेकपा माओवादी | बाँके २ (२) |
| ३८ | रत्न बहादुर खत्री | नेकपा एमाले | बाँके ३ (१) |
| ३९ | गया सुद्धिन खाँ | जसपा | बाँके ३ (१) |
| ४० | भीम बहादुर वली | नेकपा एमाले | बाँके ३ (२) |
| ४१ | कमल बहादुर बुढाथोकी | नेकपा एमाले | रोल्पा १ (१) |
| ४२ | प्रेम बहादुर घर्ती मगर | नेकपा एमाले | रोल्पा १ (२) |
| ४३ | भावना बुढाथोकी | नेकपा एमाले | रुकुम पूर्व १ (२) |
| ४४ | धन बहादुर के.सी. | नेपाली कांग्रेस | रुकुम पूर्व १ (२) |
| ४५ | कृष्ण कुमार अधिकारी | नेकपा माओवादी | प्यूठान १ (१) |
| ४६ | सरोज थापा | नेपाली कांग्रेस | प्यूठान १ (२) |
| ४७ | सालिकराम अधिकारी | नेकपा एमाले | बर्दिया १ (१) |
| ४८ | डील बहादुर के.सी. | नेकपा एस | बर्दिया १ (१) |
| ४९ | दिलीप कुमार कुर्मी | जसपा | बर्दिया १ (१) |
| ५० | भक्त बहादुर विश्वकर्मा | नेकपा एमाले | बर्दिया १ (२) |
| ५१ | अन्जु दहित | नेकपा माओवादी | बर्दिया १ (२) |
| ५२ | बखत बहादुर खड्का | नेकपा एस | बर्दिया १ (२) |
| ५३ | लहन थारु | नेकपा एमाले | बर्दिया २ (१) |
| ५४ | जन्मजय तिमिल्सिना | नेपाली कांग्रेस | बर्दिया २ (१) |
पश्चिम नवलपरासीमा भने प्रदेश सभा सदस्यतर्फ मुख्य दलका नयाँ अनुहार देखिएका छैनन् । पार्टीले टिकट दिएर उम्मेदवारी दर्ता गराएका नयाँ उम्मेदवारले पनि निर्वाचनमा चुनावी तालमेल हुने भएपछि उम्मेदवारी फिर्ता गरेका हुन् ।