पाल्पाका पालिकाले मनपरी खर्च गरेको महालेखा परीक्षकको कार्यालयले औँंल्याएको छ । आर्थिक वर्ष २०७९/०८० मा गरेको लेखापरीक्षणमा पाल्पाका १० वटा पालिकाहरूले मनपरी ढंगले २७ करोड ९० लाख ९२ हजार खर्च गरेको भनी त्यसलाई बेरुजु देखाइएको छ । अघिल्लो वर्ष यस आर्थिक वर्षको बेरुजु कम भए पनि मनपरी रुपमा खर्च गर्ने प्रवृत्ति भने रोकिएको छैन । अनुगमन, भ्रमण, बैठक भत्ता, इन्धन, सवारी साधन, औषधि खरिद, चाडपर्व खर्च, विद्यालयको दिवा खाजा, बीउबिजन खरिद, कर्मचारी भर्ना, डीपीआर तथा गुरुयोजना, उपभोक्ता समितिलाई भुक्तानी र सामाजिक सुरक्षा भत्ताजस्ता शीर्षकमा सबै भन्दा धेरै बेरुजु भएको छ । यस्तै गरी कानून मिचेर करारमा कर्मचारी भर्ना गरेर उनीहरूलाई दिएको तलब भत्तालाई महालेखाले बेरुजु ठहराएको छ ।
स्थानीय सरकार सञ्चालन ऐन २०४७ अनुसार संगठन तथा व्यवस्थापन सर्वेक्षणका आधारमा कर्मचारीको दरबन्दी प्रस्ताव गर्नुपर्छ । अस्थायी दरबन्दी सिर्जना गर्न नसकिने व्यवस्था छ । त्यस्तै दरबन्दी नै नभएको स्थानमा कर्मचारी नियुक्त गरी ठूलो रकम तलब भत्तामा खर्च गरेको महालेखाको प्रतिवेदनमा उल्लेख छ । स्थानीय तहले आन्तरिक स्रोतको विश्लेषण नगरी कर्मचारीलाई प्रोत्साहनस्वरूप भत्ता पनि दिने गरेका छन् । दिवा खाजा कार्यक्रम कार्यान्वयन पुस्तिकामा विद्यार्थीको अभिलेख राखेर खाजाबापत रकम खर्च गर्न पाउने व्यवस्था छ । तर गत आवमा यहाँका अधिकांश पालिकाले विद्यार्थीको अभिलेखै नराखी करोडौ रकम खर्चेका छन् ।
पाल्पाका १० वटा पालिका मध्ये सबै भन्दा धेरै मनपरी खर्च गर्नेमा पूर्वखोला गाउँपालिका रहेको छ । महालेखा परीक्षकको प्रतिवेदन अनुसार पालिकाले ७ करोड ३५ लाख ६१ हजार नियम विपरीत खर्च गरेको छ । अघिल्लो आर्थिक वर्षमा ६ करोड ९० लाख २० हजार अनियमित रुपमा खर्च गरेको थियो । आर्थिक वर्ष २०७९/०८० मा पालिकाले शिक्षा, स्वास्थ्य, कृषि, भौतिक पूर्वाधार निर्माण, अनुगमन, भत्ता, अनुदान जस्ता कार्यक्रमका शीर्षकमा अनियमित रुपमा ठूलो रकम खर्चेको हो । पालिकाले पूर्वखोला युवा तथा खेलकूद उपभोक्ता समितिलाई अध्यक्ष कप भलिबल र ब्याडमिन्टन खेल सञ्चालन वापतको ५ लाख नियम विपरीत भुक्तानी गरेको छ । अघिल्लो आर्थिक वर्ष भुक्तानी हुन नसकेको रकम कच्चावारी मलेप २२१ प्रमाणित गराई यसवर्ष भुक्तानी गरेको हो । रोपाइँ कार्यक्रममा १ लाख ८७ हजार ३ सय ३९ रकम अनियमित रुपमा खर्च गरेको छ । उद्धबुद्ध कलेजको स्वतन्त्र विद्यार्थी युनियनलाई आयआर्जन कार्यक्रम सञ्चालन वापत १ लाख १० हजार ३ सय ३ भुक्तानी दिएकोमा सो चेक साट्ने म्याद गुजारेर यसवर्ष १ लाख ८७ हजार भुक्तानी गरेको छ । २०७९ असार १५ मा स्ववियु अध्यक्षको बुवाको खेत भाडामा लिई भुक्तानी लिएको, बीउ खरिद लगायतका खर्च भएको बील भरपाई पेश गरी रकम भुक्तानी लिएको देखिन्छ ।
लुम्बिनी प्रदेशका पालिकाका पदाधिकारी तथा सदस्यहरूले पाउने सुविधा सम्बन्धी ऐन, २०७६ मा पालिकास्तरीय अनुगमन समितिका पदाधिकारीहरूले योजना अनुगमन गरेवापत भत्ता पाउने व्यवस्था छैन् । तर पालिकाले आफै कार्यविधि बनाएर भत्ता दिर्दै आएको छ । सन्देशमूलक सूचना प्रकाशन बापत पाल्पा मिडिया प्रालिलाई सम्झौता अनुसार १६ हजार ९ सय ५० भुक्तानी गर्नुपर्नेमा ३९ हजार ५ सय ५० भुक्तानी दिएको छ । प्रेस चौतारी नेपाललाई फर्निचर खरिद बापत १ लाख ९९ हजार ९ सय ९९ भुक्तानी गरेको छ । जुन पालिकाको सरकारी स्वामित्व भन्दा बाहिरको कार्यालयको लागि फर्निचर खरिदबापत दिएको भुक्तानी कानूनसम्वत नरहेको महालेखाले प्रतिवेदनमा उल्लेख गरेको छ । जग्गाको स्वामित्वतर्फ १४ लाख २४ हजार ३ सय ४० र .पाँच वटा विद्याललाई दिएको चार लाख अनुदान अनियमित रुपमा खर्च भएको पाइएको छ ।
पूर्वखोला गाउँपालिकाले आर्थिक वर्ष २०७९/०८० मा अनियमित खर्च गरेको विवरण
| क्र.सं. | शिर्षक | खर्च रकम |
| १ | औषधि खरिद | १७,२२,६०८।– |
| २ | अध्यक्ष कप सञ्चालन तथा व्यवस्थापन | ५,००,०००।– |
| ३ | तरकारी बीउ खरिद | ९६,०००।– |
| ४ | रोपाइँ कार्यक्रम | १,८७,३३९।– |
| ५ | योजना अनुगमन भत्ता | २,५५,८५०।– |
| ६ | बैंठक भत्ता | ५८,६५०।– |
| ७ | गाडी भाडा | ९८,५५०।– |
| ८ | दिवा खाजा कार्यक्रम | ६२,२७,४३०।– |
निस्दी गाउँपालिकाले एक अर्ब ५२ करोड ९५ लाख खर्च गर्दा ६ करोड ५८ लाख अनियमित रुपमा खर्च गरेको छ । अघिल्लो आवमा २ करोड ३ लाख मात्रै बेरुजु थियो । आर्थिक वर्ष २०७९/०८० मा पालिकाले स्वास्थ्य, कृषि, भौतिक पूर्वाधार निर्माण, अनुगमन, भत्ता, अनुदान जस्ता कार्यक्रमका शिर्षकमा अनियमित रुपमा ठूलो रकम खर्चेको छ । योजना अनुगमन शीर्षकमा पालिकाले कर्मचारी र पदाधिकारीहरुलाई भत्ताबापत २ लाख २५ हजार भुक्तानी दिएको छ । हेफर प्राजेक्ट नेपालसँगको साझेदारीमा सञ्चालित कृषि तथा पशु उद्यमशीलता विकास परियोजनाको नाममा सार्वजनिक खरिद ऐन, आर्थिक कार्यविधि तथा वित्तिय उत्तरदायित्व ऐनको परिपालना नगरी परियोजनामा उल्लेखित कार्यक्रमसँग बेमेल हुने गरी ३ करोड ४१ लाख ८१ खर्च गरेको छ । पालिकाले स्थानीय सरकार सञ्चालन ऐन २०७४ को व्यवस्था विपरीत ७ जना सामाजिक परिचालिकालाई करारमा भर्ना गरी १६ लाख १७ हजार पारिश्रमिक भुक्तानी गरेको छ । जलदेवी सामाजिक उद्यमी महिला सहकारी संस्थालाई भवन व्यस्थापन तथा रेलिङ्ग कार्यक्रमका लागि ५ लाख बजेट विनियोजन गरेकोमा नियम विपरित फर्निचर, डेल डेस्कटप कम्प्युटर, ईप्सन र ब्रदरका प्रिन्टर खरिदमा ४ लाख ७६ हजार ७ सय २० खर्च गरेको छ । पुच्छार खानेपानी लिफ्टिङ योजनाका लागि १४ लाख बजेट विनियोजन गरे पनि निर्माण सामग्री सार्वजनिक खरिद नियमावली बमोजिम सिलबन्दी दरभाउपत्रमार्फत खरिद नगरी सिधै खरिद गरेको उल्लेख छ । निर्माण कार्यको अनुगमन तथा निर्माण कार्यको गर्न पालिका आफैसँग दक्ष जनशक्ति हुँदा हुँदै सस्पेन्सन ब्रिज निर्माणको प्राविधिक तथा व्यवस्थापकीय कार्यका लागि गैरसरकारी संस्था इन्द्रेणी समाज केन्द्रलाई १ लाख ४७ हजार ८ सय ४८ भुक्तानी गरेको छ । आफुु भर्खरै सरुवा भएर आएकाले अहिले त्यस्तो बेरुजू फछ्यौंट गर्ने÷गराउने अभियान नै नचलाएको प्रमुुख प्रशासकिय अधिकृत मदन अर्यालले बताए । उनले भने ‘पालिकामा बेरुजू फच्छ्यौंट गर्ने/गराउने प्रक्रियालाई व्यवस्थित गराउने कानुनको तर्जुमा गरिएको छैन । आगामी दिनमा त्यसतर्फ ध्यान दिन्छौं ।’
निस्दी गाउँपालिकाले आर्थिक वर्ष २०७९/०८० मा अनियमित खर्च गरेको विवरण
| क्र.सं. | शिर्षक | खर्च रकम |
| १ | योजना अनुगमन भत्ता | २,२५,२५०।– |
| २ | कृषि तथा पशु उद्यमशीलता विकास परियोजना | ३,४१,८१,३१०।– |
| ३ | पर्यटन काज | २,००,०००।– |
| ४ | दिवा खाजा कार्यक्रम | ४,०७,४९०।– |
| ५ | प्रधानमन्त्री रोजगार कार्यक्रम | ४१,६५,३६३।– |
| ६ | सहकारीको भवन व्यस्थापन तथा रेलिङ्ग कार्यक्रम | ५,००,०००।– |
| ७ | पुच्छार खानेपानी लिफ्टिङ योजना | १४,००,०००।– |
| ८ | सस्पेन्सन ब्रिज निर्माण | १,४७,८४८।– |
| ९ | विद्यालय भवन निर्माण | २,०७,९३०।– |
तानसेन नगरपालिकाले पनि ३ करोड ४ लाख २३ रकम मनपरी खर्च गरेको छ । यस्तो खर्च करारका कर्मचारीलाई प्रोत्साहन भत्ता, करारमा कर्मचारी नियुक्त गरी तलब भत्ता, कन्टिन्जेन्सी, (मोटरसाइकल र इन्धनमा भुक्तानी, बील विजकमा बिक्रेताको हस्ताक्षर नभएको बीलका आधारमा शिवपार्वती मन्दिर निर्माणमा उपभोक्ता समितिलाई भुक्तानी, कृष्ण मन्दिर निर्माण उपभोक्ता समितिलाई भुक्तानी गर्दा कार्य सम्पन्न भएको मिति भन्दा पछाडीको बील लिएर, शिर्षक फरक पारी गरिएको खर्च, सट्टा शिक्षकको तलव, भत्ता र दुध अनुदान आदि रहेका छन् । तानसेन नगरपालिकाले बेरुजु हुन नदिन कुनै पनि काम गरेको छैन । प्रमुख प्रशासकिय अधिकृत हरिराम नागिलाले महालेखा परीक्षकले दिएको सुझावलाई कार्यान्वयन गर्ने बताए ।
तानसेन नगरपालिकाले आर्थिक वर्ष २०७९/०८० मा अनियमित खर्च गरेको विवरण
| क्र.सं. | शिर्षक | खर्च रकम |
| १ | ६६ जना करारका कर्मचारीलाई प्रोत्साहन भत्ता | १८,२१,०००।– |
| २ | ७९ जना करार कर्मचारी तलब | २,६०,६६,०००।– |
| ३ | सहायक पाँचौं/चौथौं लगायतका ७ वटा पदमा १३ जना करार नियुक्त गरी तलब | ४३,३१,०००।– |
| ४ | कन्टिन्जेन्सी | १,८९,०००।– |
| ५ | शिवपार्वती मन्दिर निर्माणमा उपभोक्ता समितिलाई भुक्तानी | २,८०,०००।– |
| ६ | कृष्ण मन्दिर निर्माण उपभोक्ता समितिलाई भुक्तानी | ४,२२,०००।– |
| ७ | रकम शिर्षक फरक पारी | २२,७४,०००।– |
| ८ | सट्टा शिक्षकको तलव, भत्ता | ९,७३,०००।– |
| ९ | दुध अनुदान | ९,२०,०००।– |
| १० | शीर्षक फरक पारी | ३३,६१,०००।– |
माथागढी गाउँपालिकाले ४ करोड ९ लाख २२ हजार अनियमित रुपमा खर्च गरेको छ । औषधी खरिद करारमा कर्मचारी नियुक्ति, प्रधानमन्त्री रोजगार कार्यक्रममा योजना छनौटको आधार नखुलाइएको, उन्नत बीउ अनुदान कार्यक्रम, गरिबसँग विशेश्वर कार्यक्रम, कर्मचारीहरूका लागि तलब भत्ता, पदाधिकारी भ्रमण गर्दा भ्रमण भत्ता, ऐन, नियमले गरेको व्यवस्थाको पालना नगरी टुक्रापारी सार्वजनिक खरिद, मालपोत र नापी कार्यालयका कर्मचारीलाई भ्रमण भत्ता, स्यानीटरी प्याड खरिद, झडेवा–जगत–भुटुके–महलपोखरी–सुनवल सडक स्तरोन्नती, मुख्यमन्त्री शैक्षिक सुधार कार्यक्रम, वन क्षेत्रमा भवन निर्माण, दालचिनी, तेजपत्ता प्रशोधन तथा मसला उद्योग निर्माण, दुनाटपरी मेसिन खरिद र खानेपानी तथा स्वच्छता वास योजना निर्माण जस्ता क्षेत्रमा पालिकाले गरेका खर्च बेरुजु ठहरिएको छ।
माथागढी गाउँपालिकाले आर्थिक वर्ष २०७९/०८० मा अनियमित खर्च गरेको विवरण
| क्र.सं. | शिर्षक | खर्च रकम |
| १ | औषधी खरिद | ३०,५४,२४,०००।– |
| २ | कर्मचारी करारमा नियुक्त गरी तलब, भत्ता | १,७७,४१,०००।– |
| ३ | प्रधानमन्त्री रोजगार कार्यक्रम | ३१,३३,०००।– |
| ४ | उन्नत बीउ अनुदान कार्यक्रम | ३,२५,०००।– |
| ५ | मौरीघार, गिरीराज कुखुराका चल्ला खाद्यान्न तथा तरकारीको बीउ वितरण गर्ने कर्मचारीहरूका लागि तलब, भत्ता | ८,५२,०००।– |
| ६ | जिल्लाभित्रै पदाधिकारी भ्रमण भत्ता | २२,५५०।– |
| ७ | टुक्रापारी सार्वजनिक खरिद | २२,८१,०००।– |
| ८ | मालपोत र नापी कार्यलयका कर्मचारीलाई भ्रमण भत्ता | २५,४००।– |
| ९ | स्यानीटरी प्याड खरिद | ४८,९००।– |
| १० | झडेवा–जगत–भुटुके–महलपोखरी–सुनवल सडक स्तरोन्नती | ३,३४,०००।– |
| ११ | मुख्यमन्त्री शैक्षिक सुधार कार्यक्रम | २,५६,०००।– |
| १२ | वन क्षेत्रमा भवन निर्माण | १३,८२,९९०।– |
| १३ | दालचिनी, तेजपत्ता प्रशोधन तथा मसाला उद्योग निर्माण | ३१,३९,०००।– |
| १४ | दुनाटपरी मेसिन खरिद | ९,५०,०००।– |
| १५ | खानेपानी तथा स्वच्छता वास योजना निर्माण | ४,९४,९९८ |
तिनाउ गाउँपालिकाले ९६ लाख ९५ हजार अनियमित रुपमा खर्च गरेको छ । यस पालिकाले यी क्षेत्रमा दिएका भुक्तानी बेरुजु ठहरिएको छ । दरबन्दी भन्दा बढी करार कर्मचारी नियुक्त गरी तलब भत्ता दिएको, स्वास्थ्य कार्यक्रम अन्तर्गत कार्यविधि नै नबनाई कुखुराका चल्ला वितरण, औषधी खरिद, विरुवा उत्पादन, प्रधामन्त्री रोजगार कार्यक्रम, मेडपा कार्यक्रम, सामाजिक सुरक्षा भत्ता वितरण गर्नेलाई भ्रमण भत्ता, सवारी भाडा र भ्रमण अवलोकन प्याड खरिद छन् ।
तिनाउ गाउँपालिकाले आर्थिक वर्ष २०७९/०८० मा अनियमित खर्च गरेको विवरण
| क्र.सं. | शिर्षक | खर्च रकम |
| १ | कुखुराका चल्न वितरण | ४,८९,४४०।– |
| २ | औषधी खरिद | १५,२८,०००।– |
| ३ | विरुवा उत्पादन | ३,५०,०००।– |
| ४ | प्रधानमन्त्री रोजगार कार्यक्रम | ३९,१६,०००।– |
| ५ | मेडपा कार्यक्रम | ८,७५,०००।– |
| ६ | सामाजिक सुरक्षा भत्ता बाँड्नेलाई भ्रमण भत्ता | ४१,०००।– |
| ७ | सवारी भाडा | २,४०,०००।– |
| ८ | मुस्ताङ भ्रमण | ३,३४,०००।– |
| ९ | प्याड खरिद | १३,९८,०००।– |
बगनासकाली गाउँपालिकाले ९८ लाख ८८ हजार अनियमित रुपमा खर्च गरेको छ । पालिकाले प्रकोप व्यवस्थापन कोषमा अनियमिता गरेको छ । प्रकोप व्यवस्थापन कार्यक्रमबाट प्रकोप नियन्त्रण तथा प्रकोपबाट पीडितलाई राहत उपलब्ध गराउनुपर्नेमा दुई जना कर्मचारीका लागि तलब भत्तामा उक्त रकम खर्चेको हो । पालिकाले महिला लक्षित कार्यक्रम अन्तर्गत दर खाने कार्यक्रम, तिज गित प्रतियोगिता, एकल महिलाहरूको अवलोकन भ्रमणमा दिएका भुक्तानी बेरुजु ठहरिएको छ । स्थानीय सरकार सञ्चान ऐन २०७४ को दफा ८३ (८) मा प्रहरी, सवारी चालक, बगैंचे, पलम्बर लगायतका पद तथा सेवामा बाहेक करारमा नियुक्त गर्ने व्यवस्था छैन तर पालिकाले भने इञ्जिनियर, सव इञ्जिनियर, पशु/कृषि प्राविधिक सहित २४ कर्मचारी करारमा नियुक्त गरी ठूलो रकम खर्चेको छ । यी बाहेक स्वीकृत दरबन्दी बाहिरका सहायक कम्प्यूटर, कार्यालय सहायक समेतका पदमा १० जना कर्मचारी नियुक्त, सामाजिक सुरक्षा भत्ता वितरण गर्न वडामा खटिने कर्मचारीलाई दैनिक भत्ता, सवारी साधन भाडाबापत भुक्तानी, पदाधिकारी र कर्मचारीलाई योजना अनुगमन भत्ता, अवलोकन भ्रमणमा, सवारी भाडा, कर्मचारीको फिल्ड भत्ता जस्ता क्षेत्रमा पनि मनपरी खर्च गरेको पाइन्छ ।
बगनासकाली गाउँपालिकाले आर्थिक वर्ष २०७९/०८० मा अनियमित खर्च गरेको विवरण
| क्र.सं. | शिर्षक | खर्च रकम |
| १ | प्रकोप व्यवस्थापनमा खटिने कर्मचारीको तलब भत्ता | ३,२६,०००।– |
| २ | महिला लक्षित कार्यक्रम | ६,८०,०००।– |
| ३ | दर खाने कार्यक्रम, तिज गित प्रतियोगिता र एकल महिलाहरुको अवलोकन भ्रमण | ५,९९,०००।– |
| ४ | इञ्जिनियर, सव इञ्जिनियर, पशु÷कृषि प्राविधिक सहित २४ कर्मचारी करारमा नियुक्त गरी तलब, भत्ता | १,३४,२७,०००।– |
| ५ | सहायक कम्प्यूटर, कार्यालय सहायक समेतका पदमा १० जना कर्मचारी नियुक्त गरी तलब, भत्ता | ३७,१०,०००।– |
| ६ | सामाजिक सुरक्षा भत्ता वितरण गर्न वडामा खटिने कर्मचारीलाई दैनिक भत्ता र सवारी साधान भाडा | ३४,२००।– |
| ७ | पदाधिकारी र कर्मचारीलाई योजना अनुगमन भत्ता | २,४८,०००।– |
| ८ | अवलोकन भ्रमण | १०,००,०००।– |
| ९ | सवारी भाडा | १,९५,०००।– |
| १० | कर्मचारीको भिल्ड भत्ता | २,९७,०००।– |
रम्भा गाउँपालिकाले २ करोड ३८ लाख ५९ हजार मनपरी रुपमा खर्च गरेको छ । पालिकाले ऐन विपरित करारमा कर्मचारी राखेर ठूलो रकम खर्चेको छ । उसले विभिन्न पदमा ६२ जना कर्मचारी नियुक्त, प्रधानमन्त्री रोजगार कार्यक्रम, औषधी खरिद, दिवा खाजा, रिमिघा पर्यटन प्रवद्र्धनका लागि बाटोमा ढुंगा छाप्ने कार्य, देउराली ओम भञ्ज्याङ्ग सुरुमडाँडा मसलाङ्ग मोटरबाटो स्तरोन्नतीको कार्य, ढुंगाको मेसोनरीवाल र हेफर प्रोजेक्ट नेपालसँगको साझेदारी कार्यक्रम अन्तर्गत उद्यमशील परियोजनाको खोर निर्माणमा जस्ता क्षेत्रमा अनियमिता गरेको पाइन्छ ।
रम्भा गाउँपालिकाले आर्थिक वर्ष २०७९/०८० मा अनियमित खर्च गरेको विवरण
| क्र.सं. | शिर्षक | खर्च रकम |
| १ | ६२ जना करारमा कर्मचार नियुक्त गरी तलब, भत्ता | ९१,१३,०००।– |
| २ | प्रधानमन्त्री रोजगार कार्यक्रम | ३४,१०,९४१।– |
| ३ | औषधी खरिद | १४,५२,०००।– |
| ४ | दिवा खाजा | ६४,०००।– |
| ५ | रिमिघा पर्यटन प्रवद्र्धनका लागि बाटोमा ढुंगा छाप्ने | ९,२०,०००।– |
| ६ | ढुंगाको मेसोनरीवाल | ८,९१,४१२।– |
| ७ | खोर निर्माण | १९,८०,०००।– |
रिब्दीकोट गाउँपालिकाले विभिन्न शिर्षकमा ९४ लाख २२ हजार बराबरको रकम मनपरी रुपमा खर्चेको पाइन्छ । उसले गरिबसँग विशेश्वर कार्यक्रम अन्तर्गत २ लाख ४९ हजार खर्च गरेको उल्लेख गरे पनि बीउबिजन वितरणको भरपाई नै गरेको पाइँदैन । प्रदेश तथा स्थानीय शासन सहयोग कार्यक्रममा ८ लाख ८४ हजार ८ सय ८७ अनियमित रुपमा खर्च गरेको पाइन्छ । उसले मेडपा कार्यक्रममा ६ लाख ९१ हजार खर्च गरेको छ तर उक्त कार्यक्रमबाट तालिम तथा प्रविधिको प्रयोग गरि कति जनाले लघु उद्यम सञ्चालन गरे भन्ने अभिलेख नै राखेको छैन । पालिकाले विद्युत् व्यवस्थापनका लागि भनिएको बजेट पक्की नाली निर्माण, एम्बुलेन्स सेवाका लागि भनिएको रकम प्लाष्टिकजन्य सामग्री खरिद, मसलन्द तथा कार्यालय सामग्रीका लागि भनिएको रकम सामुदायिक भवन रङ्गरोगन, अनुदान वितरण, औषधी खरिद, फर्निचर खरिद, प्रधानमन्त्री रोजगार कार्यक्रम र दरबन्दी बेगर शिक्षक व्यवस्थापन जस्ता क्षेत्रमा पनि अनियमित तरिकाले खर्च गरेको छ ।
रिब्दीकोट गाउँपालिकाले आर्थिक वर्ष २०७९/०८० मा अनियमित खर्च गरेको विवरण
| क्र.सं. | शिर्षक | खर्च रकम |
| १ | गरिबसँग विशेश्वर कार्यक्रम | २,४९,०००।– |
| २ | तालिम गोष्ठी | ९५,२००।– |
| ३ | प्रदेश तथा स्थानीय शासन सहयोग कार्यक्रम | ८,८४,८८७ ।– |
| ४ | मेडपा कार्यक्रम | ६,९१,०००।– |
| ५ | अनुदान वितरण | २,७६,०००।– |
| ६ | सवारी भाडा | ३,५३,७००।– |
| ७ | औषधी खरिद | २,४६,०००।– |
| ८ | फर्निचर खरिद | १,१५,५००।– |
| ९ | प्रधानमन्त्री रोजगार कार्यक्रम | १६,६६,०००।– |
| १० | शिक्षक अनुदान | १५,५४,९००।– |
रैनादेवी छहरा गाउँपालिकाले १ करोड ४५ लाख ५९ हजार बेप्रवाह खर्च गरेको छ । मगर समुदायको भाषा, कला, संस्कृति संरक्षण र प्रवद्र्धन, मसलन्द तथा स्टेशनरी सामग्री खरिद, अनुदान वितरण, पशु बीमा, सवारी साधान भाडा, औषधी खरिद, स्वास्थ्यका कर्मचारी अवलोकन भ्रमण, शिक्षक प्रोत्साहन कार्यक्रम, सुन्दरे ढुंगा, जुठापौवा र सालझण्डी सडक निर्माण कार्य जस्ता क्षेत्रमा ठूलो रकम अनियमिता गरेको छ ।
रैनादेवी छहरा गाउँपालिकाले आर्थिक वर्ष २०७९/०८० मा अनियमित खर्च गरेको विवरण
| क्र.सं. | शिर्षक | खर्च रकम |
| १ | मगर समुदायको भाषा, कला, संस्कृति संरक्षण र प्रवद्र्धन | ६,६५,०००।– |
| २ | मसलन्द तथा स्टेशनरी सामग्री खरिद | २४,९८,०००।– |
| ३ | अनुदान वितरण | ५४,०००।– |
| ४ | पशु बीमा | २,१९,०००।– |
| ५ | सवारी साधान भाडा | १८,६४,०००।– |
| ६ | औषधी खरिद | ५०,०००।– |
| ७ | स्वास्थ्यका कर्मचारी अवलोकन भ्रमण | १,५०,०००।– |
| ८ | शिक्षक प्रोत्साहन कार्यक्रम | १,८३,०००।– |
| ९ | मसुन्दरे ढुंगा, जुठापौवा र सालझण्डी सडक निर्माण | ४४,६७,०००।– |
रामपुर नगरपालिकाले २ करोड १६ लाख ९४ हजार रकम मनपरी रुपमा खर्च गरेको छ । नगरपालिकाले सार्वजनिक खरिद नियमावली विपरित राष्ट्रिय पत्रिकामा सूचना प्रकाशन नगरी औषधी खरिद, पदाधिकारीहरूको जिल्ला भित्रको भ्रमण गर्दा भ्रमण भत्ता, कानून विपरित पदाधिकारी र कर्मचारीहरूलाई योजना अनुगमन भत्ता, जस्तापाता खरिद, विद्यालय अनुदान र हेफर प्रोजेक्ट नेपालसँगको साझेदारीमा सञ्चालित उद्यमशिलता परियोजन अन्तर्गत खोर निर्माण जस्ता क्षेत्रमा अनियमित ढंगले खर्च गरेको पाइन्छ ।
रामपुर नगरपालिकाले आर्थिक वर्ष २०७९/०८० मा अनियमित खर्च गरेको विवरण
| क्र.सं. | शिर्षक | खर्च रकम |
| १ | औषधि खरिद | ३०,७५,०००।– |
| २ | पदाधिकारीहरूको जिल्ला भित्रको भ्रमण भत्ता | ९४,२००।– |
| ३ | पदाधिकारी र कर्मचारीहरूलाई योजना अनुगमन भत्ता | २,०८,०००।– |
| ४ | जस्तापाता खरिद | ३,७३,०००।– |
| ५ | एक आर्थिक वर्षमा एकै प्रकृतिका खरिद र एकै व्यवसायीबाट | ६३,५६,०००।– |
| ६ | विद्यालय अनुदान | २,५०,०००।– |
| ७ | खोर निर्माण | १५,९०,०००।– |
महालेखाको तथ्याङ्कले तीन तहका सरकारमध्ये सबैभन्दा बढी स्थानीय तहमै अनियमिता हुने गरेको देखाएको छ । विकासका नाममा निर्वाचित प्रतिनिधिहरूले स्वेच्छाचारी रूपमा स्रोत परिचालन गर्ने र त्यसको हिसाब समेत नराख्ने प्रवृत्तिले आर्थिक पारदर्शीतामाथि प्रश्न मात्र उठेको छैन स्थानीय तहको सुशासनमा समेत धक्का पुगेको छ । अर्कोतर्फ पालिकाहरूले प्रचलित कानूनको कार्यान्वयन गर्ने जाँगर देखाएका छैनन् । यसले गर्दा बेरुजु बढेको छ । स्थानीय सरकार सञ्चालन ऐन, २०७४ को दफा ८४ मा स्थानीय तहको बेरुजू फच्छ्यौंट गर्ने गराउने काम कर्तव्य प्रमुख प्रशासकीय अधिकृतको हुने व्यवस्था छ । तर जनप्रतिनिधिहरूको दवाबले गर्दा प्रमुख प्रशासकीय अधिकृतहरू निरीह भएका छन् । अधिकांश पालिकाले बेरुजू फच्छ्यौंट गर्ने गराउने प्रक्रियालाई व्यवस्थित गराउने कानून बनाएका छैनन् ।